У Астрожскай акадэміі прэзентавалі навукова-папулярнае выданне "Князі Астрожскія". Прэзентацыя выдання "Князі Астрожскія» адбылася пры ўдзеле аднаго з аўтараў, кандыдата гістарычных навук, дацэнта Кіева-Магілянскай акадэміі Ігара Цясленка, галоўнага рэдактара выдавецтва "Балтыя-Друк" Віргініюса Строля і рэктара Нацыянальнага ўніверсітэта "Астрожская акадэмія", прафесара Ігара Пасечніка.
Сёлета беларусы, украінцы і літоўцы святкавалі 500-годдзе перамогі ў бітве пад Воршай, у якой аб'яднанае войска Вялікага княства Літоўскага і Каралеўства Польскага на чале з князем Канстанцінам Астрожскім перамагло войска Маскоўскага царства. Аднак выданне кнігі "Князі Астрожскія" прымеркавана не толькі гэтай падзеі, але і звязана з іншымі прадстаўнікамі роду, якія займалі высокія адміністрацыйныя і ваенныя пасады. У прыватнасці, яны вядомыя сваёй мецэнацкай дзейнасцю, бо па ініцыятыве князя Васіля-Канстанціна Астрожскага была створана першая вышэйшая навучальная ўстанова ва Ўсходняй Еўропе - Астрожская акадэмія, і ўпершыню выдадзеная Біблія на царкоўнаславянскай мове.
- Радавод князёў Астрожскіх здзіўляе не толькі цяперашнія, але і будучыя пакаленні, бо з іх дзейнасці і біяграфій выцякаюць усё новыя і новыя ключавыя старонкі. Дзякуючы карэктуры кніга лёгка чытаецца, а ўдалыя ілюстрацыі па-асабліваму ўзмацняюць тэкст, - заўважыў Ігар Пасечнік, яго словы прыводзіць "Новини Рівного".
Па словах Віргініюса Строля, мэта гэтага выдання - распавесці свету пра Ўкраіну, бо Ўкраіну ведаюць толькі па казацтве і Шаўчэнку, а яна багатая і на цікавых асобаў. Значыць, больш стане вядома і пра Беларусь.
- Ілюстрацыі ў выданні ў асноўным унікальныя, ніколі раней ва Ўкраіне не публікаваліся. Гэта ілюстрацыі з прыватных калекцый, з замежных архіваў. Гэта фатаграфіі месцаў памяці князёў Астрожскіх. Падчас працы высвятляліся такія біяграфічныя звесткі, звязаныя з князем Астрожскім, пра якія да гэтага часу няма спецыяльных навуковых артыкулаў, - адзначыў Ігар Цясленка.
У выданне былі прыцягнутыя гістарычныя дакументы і архіўныя матэрыялы, сабраныя ў 26-ці музеях Беларусі, Украіны, Польшчы, Літвы. Гістарычныя даследаванні ілюструюць амаль 800 фотаздымкаў.
