Пасля наступлення Новага году многія аршанцы выйшлі на вуліцы, каб працягнуць святкаванне на свежым паветры. У розных раёнах гораду стыхійна ўтвараліся свае кропкі збору, але асноўныя падзеі, канешне, разгортваліся на асноўнай ялінцы гораду - каля Езуіцкага калегіюму. На сцэне каля ялінкі былі арганізаваныя выступы самадзейнасці, карагод вакол ялінкі з Дзедам Марозам і Снягуркай. Рамантычным момантам навагодняй ночы стала прамова са сцэны не прадстаўленага хлопца, які на вачах усіх прысутных зрабіў сваёй дзяўчыне прапанову выйсці замуж. Канешне, месца святкавання было ачэплена, а на праходзе ўнутар міліцыя даглядала рэчы ахвотных зайсці. Вакол агароджы людзей хадзіла больш чым унутры. Тыя ж хто заходзілі ўнутар ачаплення часцей за ўсё доўга не затрымліваліся, адначасова ў ачэпленым перыметры знаходзілася не больш за 200 чалавек разам з супрацоўнікамі міліцыі.
Самым папулярным "атракцыёнам" ночы стала фатаграфаванне побач са светлавымі фігурамі - аленем у цэнтры каля стаянкі таксі і фігурай Дзеда Мароза каля калегіюма. На наступны дзень сацыяльныя сеткі запаланілі фотаздымкі з гэтымі героямі навагодняй ночы.
