На форуме сайта "Глобус Беларусі" ў тэме "хроніка аднаўлення беларускіх помнікаў" Віктар Сцяпанаў апублікаваў запіс дзе разважае на тэму сучаснага і будучыні помніка архітэктуры "былы базылянскі манастыр". У прыватнасці, Віктар - які быў адным з ініцыятараў некалькіх мерапрыемстваў у падтрымку рэстаўрацыі і збору сродкаў на яе - апелюе да ліста які нядаўна даслалі адказныя царкоўнікі каязнаўцам.
Прыводзім цытату: "Ігумення Анфіса і манахіня Данііла з талачынскага Свята-Покроўскага манастыра, за якім "замацаваны" аршанскі гістарычны помнік, пішуць, што за мінулыя 8 год тут прыбралі смецце, абгарадзілі будынак плотам, забілі дошкамі вокны і дзверы ( але, трэба зазначыць, не ўсе), частку будынка накрылі дахам (не больш за адну чацвёртую частку, у чым можа на ўласныя вочы пераканацца любы аршанец). Таксама пабудавалі побач драўляную царкву (якое гэта мае значэнне для захаванасці помніка архітэктуры, так і застаецца невядомым) і пасля абследвання замовілі праект рэстаўрацыі будынка. А пра тое, што праектная дакументацыя "у стане завяршэння", краязнаўца чуюць ужо на працягу года."
Пры гэтым, Сцяпанаў падкрэслівае "Далей у лісце – адно толькі рамантычна-ўзнёслыя "прызнанні ў любові".......Усе гэтыя прызнанні і абяцанні выглядаюць непераканаўча, калі згадаць, што помнік чарговы год запар сустрэў першыя снегапады без даху…" І далей, краязнаўца выказвае прапанову: "Прапаную ўсім неабыякавым да лёсу архітэктурна-гістарычнага помніка “Былы кляштар базылянаў” у Воршы абмяркаваць наступную прапанову: зважаючы на недбайнае стаўленне цяперашняга гаспадара, звярнуцца да дзяржавы з прапановаю павяртаць будынак у гарадскую ўласнасць, з тым, каб з прыцягненнем інвестараў стварыць у гэтым будынку мульціканфесійны гатэль для пілігрымаў. Усе накопленыя на дабрачынным рахунку грошы перадаць у распараджэнне гарадскіх уладаў з умоваю абавязковага мэтавага выкарыстання сродкаў. Падрыхтаваны «Праваслаўнай майстэрняй архітэктара Лук'янчыка М.І.» праэкт рэстаўрацыі, наколькі мне вядома, вялікай пераробкі ў такім выпадку не запатрабуе."
На думку аўтара вяртанне будынка з царкоўнай у гарадскую ўласнасць дае магчымасць стварыць грамадскі фонд дзеля збірання сродкаў, які зможа аб'яднаць людзей розных канфесіяў, што прынясе больш карысці "паколькі цяперашні ўладальнік дэманструе няздольнасць даць рады будынку."
Прапануем і нашым чытачам выказацца на азначаную тэму ў каментарах да гэтага артыкулу.
