Каменныя крыжы, камяні з надпісамі, культавыя камяні паводле закону аб ахове помнікаў лічацца археалагічнымі каштаўнасцямі ды ўвогуле прыцягваюць вялікі інтарэс цікаўных. Але далёка не ўсе такія камяні стаяць на ўліку і ахоўваюцца дзяржавай. Два камяні ў выглядзе крыжоў (усталяваныя верагодна ў 16-м стагоддзі) маюцца на могілках у вёсцы Стаўры, адзін з іх з бачным малюнкам. Першапачаткова крыжы, відавочна, стаялі на магілах, але з часам магілы перасталі быць бачныя, а крыжы паваліліся і доўга ляжалі на замлі зарастаючы травой і кустоўем.
Мясцовыя жыхары, якія даглядаюць могілкі паспрабавалі вярнуць крыжам першапачатковы выгляд. На тых месцах дзе яны ляжалі раней, адзін з крыжоў ужо быў падняты і пастаўлены ў вертыкальнае становішча, другі чакае сваёй чаргі. Пры гэтым, абодва крыжы ўжо зараз абнесены адмыслова зваранай агароджай. Пазней каля абодвух крыжоў з'явяцца таблічкі з тлумачэннем каштоўнасці гэтых камянёў як гістарычных артэфактаў.
