Гульня 24-га туру чэмпіянату Беларусі па футболе сярод каманд 1-й лігі паміж "Оршай" і "Баранавічамі" скончылася ўнічыю. Абедзьве каманды мелі магчымасці вызначыцца голам, ініцыятыва пераходзіла ад адной каманды да другой, але лік так і застаўся стартавым - 0:0. Такім чынам, "Орша" не здолела ўзяць у "Баранавічаў" рэванш за буйную паразу ў гасцях, што здарылася ў першым коле чэмпіянату. Тады "сіня-белыя" саступілі 1:5.
Нагадаем, матчы "Оршы" з "Баранавічамі" лічацца аднымі з найбольш агрэсіўных і прынцыповых у Беларусі. Клубы карыстаюцца вялікай падтрымкай арганізаваных фанатаў і ў цэлым жыхароў сваіх гарадоў, трыбуны ў Оршы і ў Баранавічах рэгулярна збіраюць звыш 1 500 заўзятараў, чаго не маюць некаторыя клубы нават вышэйшай лігі. Градус супрацьстаяння істотна павышаюць і стасункі паміж футбалістамі - у апошнія гады ў гульнях "сіня-белых" з "чырвона-сінімі" часта здараюцца канфлікты, сутыкненні, выдаленні футбалістаў, трэнераў і іншых афіцыйных асобаў.
