Сістэма розыгрышу сёлета застанецца амаль той жа, што была і ў мінулым сезоне. Аршанскі "Ўзлёт", далейшае існаванне якога знаходзілася пад пагрозай, унесены ў спіс удзельнікаў чэмпіянату ў дывізіёне Б. Сярод супернікаў: СДзЮШАР-ЦАР (Жлобін), ВА РБ (Менск), АСДзЮШАР (Гародня), Атлант (Паставы), РДУАР (Менск).
Спаборніцтвы падзеленыя на тры этапы. На папярэднім каманды згуляюць паміж сабой у сістэме падвоеных тураў, усяго правядуць па 20 матчаў у кругавой сістэме. Затым 4 лепшыя з 6 каманд выйдуць у паўфінальны этап і там згуляюць у 1/8 фіналу дуэлі да 2-х перамог з камандамі, што занялі 5-8 месцы ў дывізіёне "А". Першы матч праводзіцца на полі каманды з дывізіёну "Б", гульня ў адказ на пляцоўцы клуба з дывізіёну "А". У выпадку ліку 1:1 па перамогах адразу па заканчэнні другой сустрэчы будзе прызначаная "залатая партыя" да 15 пунктаў. У 1/4 фіналу да пераможцаў 1/8 далучацца лепшыя чатыры клубы дывізіёну "А" па выніках папярэдняга этапу. Пераможцы 1/4 фіналу ўтвораць групу з 4 каманд і ў кругавым турніры высветляць чэмпіёна і прызёраў.
Расклад матчаў чэмпіянату стане вядомым пазней.
