Аршанская гоншчыца на трэку Таццяна Шаракова на 1-м этапе Кубка свету па велатрэку ў калумбійскім Калі паставіла новы рэкорд Беларусі. У скрэтчы, што адкрываў праграму омніюму, Шаракова фінішавала толькі на 15-м месцы. Затое бліскуча праявіла сябе ў індывідуальнай гонцы пераследвання - 3:33.984 за 3 кіламетры шляху. Гэта новы рэкорд Беларусі.
Цікава адзначыць, што папярэдні рэкорд нашай краіны ў гэтай дысцыпліне таксама належаў Таццяне. Ён быў усталяваны сёлета на чэмпіянаце свету ў Францыі, у Калумбіі з яго ўдалося скінуць амаль 1,5 секунды.
У гонцы на выбыванне Шаракова была 2-й, у гіце на 500 метраў заняла 8-ю пазіцыю, а групавую гонку скончыла на 5-м радку. Таццяна Шаракова прэтэндуе на паездку на Алімпійскія гульні-2016 у Рыа-дэ-Жанэйра.
