Працягваецца рэгулярны чэмпіянат Віцебскай абласной непрафесійнай баскетбольнай лігі. Аршанскія СДзЮШАР №2 і "Сонейка" 31-га студзеня правялі па матчы ў Віцебску. Каманда дзіцяча-юнацкай школы праводзіла са "Скарпіёнам" прапушчаны матч 7-га туру. Не дзіўна, што дасведчаны "Скарпіён" выйграў з буйным лікам 102:60 (20-15, 22-10, 32-13, 28-22), але аршанскія хлопцы працягваюць набірацца вопыту на будучыню. У СДзЮШАР № 2 самым выніковым стаў Вячаслаў Парчэўскі, які набраў 18 пунктаў.
"Сонейка" ж з календара не выбівалася і праводзіла запланаваны матч 9-га туру з лідэрам сезону "БЛ Груп". Аршанцы згулялі вельмі дастойна, і фаварыт сустрэчы выйграў з не самым вялікім адрывам 91:72 (17-13, 24-13, 23-27, 27-19). Больш за ўсё балаў у скарбонку "Сонейка" прынёс Уладзіслаў Тайнікоў — 20 пунктаў.
