Напярэдадні Калядных і Навагодніх святаў наш сайт арганізаваў конкурс сярод чытачоў. На сайт быў выстаўлены наступны фотаздымак Оршы , зроблены ў 1944 годзе. На здымку - шырокая па мерках таго часу вуліца . У левай частцы фота - двухпавярховы будынак са згарэлым дахам , а ў правай частцы здымка - фрагмент яшчэ аднаго двухпавярховага дома з захаваным дахам , побач тэлеграфны слуп. У абодвух будынкаў выбітыя практычна ўсе аконныя праёмы. Гэтыя два дамы існуюць і ў сённяшняй Оршы.
Чытачам прапаноўвалася адказаць на наступныя пытанні :
1 . Дзе размешчаны гэтыя два дамы і што ў іх знаходзіцца цяпер?
2 . Якая вуліца намаляваная на здымку? Як яна называлася ў той час ?
Пытанні былі складанымі. І ўсё - ж разгадаць гэты рэбус было можна, калі звярнуць увагу на размешчаны на заднім плане фота храм Апекі Базыльянскага кляштара , знесены у 1969 годзе. Ён размяшчаўся прыкладна на месцы цяперашняга ГАУС па вул. Энгельса і ад яго да гэтага часу захаваўся жылы корпус. Гледзячы на размяшчэнне храма можна прывязаць да мясцовасці і два дома на фатаграфіі: злева - цяперашняе дзіцячае аддзяленне бальніцы Сямашка (пасля рамонту ў 2005 годзе яно моцна змянілася ), а справа - фрагмент корпуса тэрапеўтычнага аддзялення бальніцы Сямашка (таксама вытрымала шэраг прыбудоў) . Першым на гэтае пытанне адказаў аршанец Аляксандр Сліжоў, якому і дастаўся прыз - набор навагодніх цацак. Літаральна праз 15 мінут той жа дакладны адказ даў яшчэ адзін аршанец Аляксей Кантроўскі
А вось на пытанне пра вуліцу правільнага адказу не паступіла наогул. Але гэта і не дзіўна. Вуліцы гэтай на тым месцы цяпер няма. Там, дзе яна праходзіла, растуць некалькі паўвекавых ліп і высокая бяроза. Але да 1950- х гадоў вуліца Камсамольская крута паварочвала на месцы былога кафэ "Чабурашка" ўлева і ўніз уздоўж бальніцы выходзіла да Аршыцы , злучаючыся за нізкім мастком з вуліцай Народнай на рынку. Высокай насыпы, па якой ідзе зараз шлях з Цэнтра на рынак не было. Вось як раз адрэзак той ўжо не існуючай Камсамольскай і захаваў фатограф. Дарэчы, менавіта таму адрас бальніцы Сямашка да гэтага часу - Камсамольская, 2а. Хоць сённяшняя вуліца Камсамольская да бальніцы не выходзіць.
