Крама "Алмі" ўжо некалькі гадоў знаходзіцца ў Оршы па адрасе вуліца 60 год БССР, 3. Раней да працы вялікай крамы ў некалькі паверхаў было мала прэтэнзій, аднак цяпер атрымаўся скандал. Валанцёры з ліку актывістаў міжнароднай кампаніі "Хрюши против - Беларусь" наведалі "Алмі" ў Оршы і запісалі на відэа шэраг парушэнняў пры продажы тавару. Напрыклад, на прылаўках была знойдзеная пратэрмінаваная прадукцыя - зялёныя бачкавыя памідоры, пакрытыя цвіллю, а па вітрыне з салатамі поўзаў прусак, што сведчыць пра недастатковыя меры гігіены ў краме. Акрамя таго, супрацоўнікі "Алмі" не толькі не пачалі ліквідаваць свае хібы, але і выклікалі на валанцёраў кампаніі міліцыю. Яны апелявалі да таго, што ў краме ніхто не мае права здымаць. Хаця насамрэч закон прадугледжвае дазвол на здыманне відэа ў грамадскіх агульнадаступных месцах.
Пасля выкліку ў краму нараду міліцыі актывісты доўга размаўлялі і з ёй. У выніку ў кнігу скаргаў і прапановаў быў унесены запіс пра кепскія адносіны супрацоўнікаў "Алмі" да наведнікаў і наяўнасць пратэрмінаванай прадукцыі на прылаўках.
Зусім нядаўна падобная гісторыя здарылася ў рэстаране "Стары замак" на чыгуначным вакзале. У рэстарацыі, якую ў побыце людзі называюць проста "Чердак", наведнікам з кампаніі "Наш дом" разбілі камеру і напісалі на іх заяву ў міліцыю, хаця яны мелі права здымаць відэа ў грамадскім месцы. У выніку, пасля з'яўлення таго відэа аршанцы ўбачылі неналежныя, абыякавыя адносіны персаналу рэстарацыі да сваіх прамых абавязкаў.
Цяпер непрыемная сітуацыя ўзнікла ў краме "Алмі". Актывісты кампаніі "Хрюши против - Беларусь" не маюць на мэце пасварыцца з персаналам той ці іншай установы, іх мэта - ліквідаваць парушэнні і стымуляваць розныя ўстановы дбаць пра сваіх наведнікаў, аказваць ім якасныя паслугі.
