За карыстанне крэдытам Экспартна-імпартнага банка Кітая заплацяць з дзяржбюджэту, адпаведная пастанова № 88 урада Беларусі выйшла 1-га лютага. Працэнты па крэдыце будуць пакрыты за кошт сродкаў рэспубліканскага бюджэту, якія былі прадугледжаныя "на іншыя пытанні ў сферы прамысловасці, будаўніцтва і архітэктуры". Крэдыт быў узяты яшчэ 30-га снежня 2015 года памерам 51 млн 834,7 тыс. даляраў ЗША з мэтай працягу другога этапу мадэрнізацыі ільнокамбіната з пашырэннем вытворчасці ў Оршы па вуліцы Маладзёжнай, 3. З умовай, што пакрыццё працэнтаў па крэдыце будзе рабіцца ў беларускіх рублях па афіцыйным курсе Нацыянальнага банка на дату іх пакрыцця. Кантроль за выкананнем ускладзены на канцэрн "Беллегпрам", аналагічная пастанова была прынята і ў 2016 годзе.

Аршанскі льнокамбінат часта з'яўляецца ў стужцы навінаў нашага сайту. Нярэдка рабочыя камбіната скардзяцца на цяжкія ўмовы працы, частка людзей была пераведзена на 4-дзённы працоўны тыдзень. На камбінаце працуе ўжо нямала рабочых з Кітая, пры тым, што ў Оршы шмат беспрацоўных, а не любая праца, якую выконваюць госці з Паднябеснай, патрабуе спецыяльнага і доўгага навучання. Паводле некаторай інфармацыі, прысутнасць кітайскіх рабочых уваходзіць у дамоўленасць беларускага боку з кітайскім. Кіраўніцтва ільнокамбіната напярэдадні заявіла аб наладжванні шчыльных кантактаў з Індыяй і аб агульным пашырэнні геаграфіі паставак прадпрыемства.