Чаго бракуе для камфортнага жыцця і адпачынку ў Воршы? Якіх падзеяў і з’яў не хапае культурнаму жыццю? Якім вы хочаце бачыць свой горад? Менавіта такія пытанні-падказкі для нараджэння ідэй прапануюць арганізатары конкурсу. “Будзьма беларусамі!” аб’ехала з “Кірмашамі” Віцебск, Магілёў, Брэст, Гродна, Рагачоў і іншыя гарады і мястэчкі Беларусі. Дзякуючы гэтаму фармату многія цікавыя гарадскія ініцыятывы здзейсніліся, іх ініцыятары пазнаходзілі аднадумцаў і для рэалізацыі іншых цікавых праектаў. Да прыкладу, у гэтым годзе “Кірмаш праектаў” у Віцебску дапамог узбагаціць Дзень горада і Дзень моладзі мноствам адметных падзей. Сярод іх – Летні маркет “Барадулінкі”, фестываль актыўнага адпачынку “Свята ветру”, турнір па футбольным фрыстайле “Вежа”, першая агульнагарадская фотасушка, “Спеўны сход” і нават вулічныя майстар-класы па танцах. А ў Магілёве з’явілася “Палатно гісторыі ў стылі графіці”, якое расказвала пра найбольш значныя гістарычныя даты, а яшчэ ініцыятыўныя жыхары горада здзейснілі літаратурны праект “Паэзія ў метро”, чым па атмасферы наблізілі свой горад да Лондана.

Кампанія “Будзьма беларусамі!” ладзіць такія конкурсы ў розных гарадах Беларусі, каб дапамагчы жыхарам горада знайсці выйсце ў рашэнні важных мясцовых пытанняў. Цяпер чарга Оршы.

Каб стаць удзельнікам конкурсу, неабходна да 15.03.2018 уключна даслаць сваю ідэю на [email protected] з пазнакай “Кірмаш праектаў-Ворша”.

Праекты прымаюцца ў фармаце прэзентацый PowerPoint і аналагічных з пазначэннем дадзеных удзельніка (прозвішча, імя, арганізацыя, назва праекта, кантактны нумар тэлефона).

Што трэба ўключыць у прэзентацыю?

назва, мэта і сутнасць ідэі;

чаму і каму гэты праект неабходны?

калі і дзе ідэя мусіць рэалізавацца?

якія рэсурсы вы ўжо маеце і якія — шукаеце? (каманда, партнёры, бюджэт).

Астатнія падрабязнасці змешчаны на сайце "Будзьмы". Даведкі і падрабязнасці: (29) 319 93 09 – Юрась, [email protected]