Абласное ўпраўленне ўнутраных справаў распавяло некаторыя дадатковыя падрабязнасці нападу на супрацоўнікаў міліцыі. Нагадаем, што ўся гэтая сітуацыя разгарнулася з-за пажару ў вёсцы Пагосцік, які адбыўся раніцай 28 сакавіка. Двое міліцыянтаў, прыпісаныя да Бараньскай міліцыі паехалі ў вёску Хімінічы, бо пад іх падазрэнне патрапіў адзін з жыхароў гэтай вёскі - гаворка ішла пра магчымы падпал дома.
Знайшлі мужчыну на скраіне вёскі, але надта размаўляць той не захацеў. У пэўны момант ён схапіў газавы балончык - газ дастаўся ўчастковаму. А потым і нож. На другога міліцыянта ён накінуўся з нажом і нанес яму некалькі ўдараў.
З моманту затрымання, нападнік знаходзіцца пад вартай. Заведзена крымінальная справа. На дадзены момант вясковец абвінавачваецца ў спробе забойства супрацоўніка міліцыі.
