Інцыдэнт адбыўся 1 студзеня, каля 22 гадзін, каля вёскі Старая Будаўка Талачынскага раёна. Аўтобус ехаў па маршруце Пінск - Баранавічы - Барысаў - Орша - Масква. Кіравалі ім напераменку два кіроўцы. У Барысаве ў аўтобус сеў мясцовы 62-гадовы пенсіянер. Мужчына быў п'яны, але паводзіў сябе спакойна, піша «Наша Талачыншчына». Як пазней даведаліся праваахоўнікі, барысаўчанін сказаў жонцы, што паедзе на дачу ў вёсцы, на самай жа справе сабраўся ў Москву. Праз некаторы час пасажыр папрасіў кіроўцу спыніцца. Той параіў яму скарыстацца біяпрыбіральняй ў аўтобусе. Аднак пенсіянер настаяў, каб для яго зрабілі санітарны прыпынак. Яму пайшлі насустрач. Мужчына адправіўся ў лес, але доўга не вяртаўся. Хвілін праз 20 хвілін за ім пайшоў адзін з кіроўцаў.

У лесе пасажыр нечакана нанёс кіроўцу ўдар нажом. Пацярпелы паклікаў напарніка, той дапамог яму дабрацца да аўтобуса. Сярод пасажыраў была лекар, яна аказала пацярпеламу першую дапамогу. Тут жа выклікалі міліцыю і хуткую. З пранікальным раненнем брушной поласці кіроўцу даставілі ў рэанімацыю.

Міліцыянты знайшлі барысаўчаніна ў лесе метрах у 400 ад аўтобуса. Ён ляжаў пад елкай тварам долу. Пад ім знаходзіліся складаны нож з адведзеным лязом і пасатыжы.

Суд Талачынскага раёна кваліфікаваў дзеянні жыхара Барысава як наўмыснае прычыненне пацярпеламу цяжкага цялеснага пашкоджання, небяспечнага для яго жыцця. Мужчына атрымаў 4 гады абмежавання волi без накіравання ў выпраўленчую ўстанову адкрытага тыпу.

Пенсіянер прызнаў віну, раскаяўся ў зробленым і кампенсаваў шкоду пацярпеламу.