Летам мінулага года мы апісвалі гісторыю пра тое, як у Балбасава каханак спрабаваў забіць сваю былую сужыцельніцу. Мужчына раніў жанчыну і паспрабаваў схавацца. Яго лавілі з удзелам АМАПу. 31 ліпеня яго змаглі затрамць на чыгуначнай станцыіі "Звёздны", дзе мужчына паспрабаваў яшчэ і аказаць супраціў міліцыі.
Як паведамляе газета "СБ-Беларусь сегодня", на днях мужчыну асудзілі і прыгаварылі да 8 гадоў пазбаўлення волі. Таксама газетны артыкул адказвае на некаторыя пытанні, якія да гэтае пары былі не зразумелыя.
Па-першае, адкуль "Стралок" узяў стрэльбу? Як выявіла следства, калі мужчына працаваў лесніком, то знайшоў гэтую стрэльбу ў лесе, а патроны пазней выпрасіў у паляўнічых. Па-другое, прычыны страляніны. Раней паведамлялася, што матыў здарэння - рэўнасць. Цяпер стала вядома больш. За паўгады да здарэння былыя сужыцелі разыйшліся. Але 45-гадовы мужчына хацеў вярнуць адносіны і паўгады амаль тэрарызаваў сваю сужыцельніцу: сустракаў яе пасля работы, спрабаваў пагаварыць і, нават, дарыў кветкі, а калі падарункі адвяргаліся, то пагражаў забіць і сябе і яе. Прычына іхняга разыходу - частыя сваркі з прымяненнем сілы, даводзілася, нават, выклікаць участковага, каб уціхамірыць дэбашыра.
У выніку, 30 ліпеня 2017 года мужчына падкаравуліў сваю былую 42-гадовую каханку ў пад'ездзе і стрэліў у яе. На судзе ён спрабаваў патлумачыць, што хацеў стрэліць не ў яе, а ў сябе. Але жанчына спужалася ўзброенага каханка, паспрабавала збегчы, а ён стукнуў стрэльбай па перылах і так адбыўся той самы стрэл. Хуткую дапамогу выклікала маці жанчыны, якая выйшла з кватэры на крык дачкі. Мужчына ж збег і доўга адседжваўся на магіле сваёй маці.
Пра супраціў міліцыі мужчына таксама гаворыць адмоўна - ён зноў гаварыў пра спробу застраліцца, калі яго акружылі на "Звёздным". Але калі паспрабаваў стрэліць адбылася асечка, стрэльба не спрацавала. Жанчына ж цудам выжыла. Куля прайшла наскрозь цела і не закранула жыццёва важныя органы.
