Малодшы лейтэнант Мікалай Раеў служыў у Мсціслаўскім РАУС і 16-га лістапада 2018 груба парушыў закон. Ён збіваў затрыманых за адміністрацыйнае правапарушэнне Аляксея Швядкова і Мікалая Купчына. За гэта былы ўчастковы будзе сядзець у калоніі ўзмоцненага рэжыму 3 гады. Ён пазбаўлены звання "малодшы лейтэнант". Гэта мінімальна магчымы турэмны тэрмін па артыкуле 426 КК РБ "Перавышэнне ўлады або службовых паўнамоцтваў". Асуджаны Раеў быў судом суседняга Горацкага раёна.

Праўда, пацярпелыя сцвярджалі, што ў збіцці бралі ўдзел яшчэ сямёра міліцыянтаў, і кожны з іх мог прадухіліць злачынства. Але ніхто рабіць гэтага не стаў. Следства перакваліфікавала справу такім чынам, што астатнія 7 міліцыянтаў апынуліся па-за статусам "падазраваны", а затым адпаведна "падсудны", яны праходзілі толькі як сведкі.

Пацярпелы Аляксеў Швядкоў спадзяецца, што ў Мсціслаўскім РАУС правераць ўсіх супрацоўнікаў на прафпрыдатнасць. Магчыма, выявяцца іншыя выпадкі крымінальных дзеянняў міліцыянтаў. Праваабаронцы раяць усім пацярпелым ад міліцэйскага гвалту не замоўчваць факты збіцця і пагрозаў з боку сілавікоў, а праўдзіва паведамляць пра іх. Тады ёсць шанец прыцягнуць вінаватых да крымінальнай адказнасці. І тады злачынца ў пагонах будзе пакараны.