На па-за мінулым тыдні на Аршаншчыне ўзмацніліся палітычныя рэпрэсіі, яўна звязаныя з пачаткам выбарчай кампаніі. Амаль кожны дзень у судзе Аршанскага раёна адбываюцца разгляды спраў па "экстрэмісцкіх артыкулах". У гэтых рэпрэсіях складана шукаць нейкую логіку дзеянняў, спрабаваць вылічаць на каго канрэтна скіраваныя арышты і затрыманні. Але па публічнай інфармацыі бачна, што найбольшая ўвага сілавікоў прыцягнута да чыгуначнікаў.
Так, не выходзячы на волю, ўжо трэці раз быў асуджаны машыніст лакаматыўнага дэпо Юрый Жук. Апошні раз яго асудзілі на "суткі" 13 лістапада, але да таго судзілі двойчы.
А на мінулым тыдні ў спіс экстрэмістаў дадалі ўжо асуджанага Аляксандра Камленка. Да 2020 года ён таксама працаваў машыністам, а апошнім часам быў дальнабойшчыкам і быў затрыманы калі вярнуўся з рэйса ў лютым гэтага года. Таксама на мінулым тыдні стала вядома, што быў затрыманы Валянцін Валянцінавіч Мартынаў - манцёр чыгуначных пуцей. Яго вінавацяць па крымінальным артыкуле ў распаўсюдзе экстрэмісцкай інфармацыі.
