Актывіст Руху "За Свабоду" Ілля Дабратвор атрымаў штраф ад беларускага суда за ўдзел у акцыі за... Незалежнасць Беларусі. Лукашэнкаўская ўлада працягвае пераслед праціўнікаў паглыбленай інтэграцыі з Расеяй. На судзе супраць Дабратвора, які заявіў, што рыхтаваў на мітынгу матэрыялы для прэсы, а менавіта для афіцыйнага сайту Руху, сведчылі два амапаўцы. Праўда, згодна з цяперашнім заканадаўствам, прынятым са студзеня 2019 года Палатай прадстаўнікоў, выбары ў якую не прызнаныя, Дабратвор не мог лічыцца журналістам, паколькі не быў адпаведна пазначаны і не мае афіцыйнай акрэдытацыі, якая, дарэчы, часта без дай-прычыны проста не выдаецца рэпарцёрам незалежным медыярэсурсаў.
Адзін з супрацоўнікаў АМАПу Артур Хуцкі 1983 года нараджэння паходзіць з Оршы. На судзе ён без сумневаў заявіў, што Дабратвор трымаў на акцыі "сцяг або транспарант", пры тым, што ніякіх фотаматэрыялаў, якія б засведчылі словы Хуцкага, не аказалася, на фотаздымках Дабратвор не трымаў ні нацыянальнага бел-чырвона-белага сцяга, ні транспаранту. Саслужывец Хуцкага — Дзмітрый Вавянкоў з пасёлка Мальскі Магілёўскай вобласці, назваў такі самы хатні адрас у Менску, як і Хуцкі. Ён заявіў, што "Дабратвор выкрыкваў лозунгі на беларускай мове, у мае абавязкі ўваходзіць глядзець у рот людзям. Раней я яго не бачыў і не чуў, але ўпэўнены, што гэта ён, рот у яго адкрываўся".
І хоць паказанні Хуцкага і Вавянкова абвяргалі фотаматэрыялы, а відэаздымку суддзя праглядаць адмовіўся, суд Маскоўскага раёна Менска фактычна толькі на падставе сумнеўных і блытаных сведчанняў амапаўцаў прысудзіў Дабратвора да штрафу ў 30 базавых велічынь за акцыю супраць інтэграцыі з Расеяй 7 снежня.
