Зміцер Казлоў адзін з папулярнейшых грамадска-палітычных блогераў 2020 года. Жыхар Барані ўдзельнічаў і здымаў ролікі як з Оршы, так і з іншых рэгіёнаў краіны. Таму і быў затрыманы яшчэ да выбараў - 10 чэрвеня 2020 года. І быў асуджаны 25 траўня 2021 года на пяць гадоў калоніі за арганізацыю несанкцыянаваных акцыяў.
Зміцер мусіў вызваліцца прыблізна праз тыдзень, але сёння стала вядома, што супраць яго завялі новую справу, якая будзе разглядацца 29 лістапада ў Бабаруйскім судзе. Яго плануюць судзіць па артыкуле 411 крымінальнага кодэксу - лёгкі артыкул для адміністрацыі калоніяў, каб не выпусціць чалавека. Бо па гэтым артыкуле (ён прадугледжвае не падпарадкаванне адміністрацыі калоніі) можна асудзіць чалавека нават за незашпілены гузік на форме, або за тое, што чалавек кепска пагаліўся. Пры гэтым якасць галення ацэньваць будзе сама адміністрацыя.
