Грамадскае абмеркаванне генеральнага плану ідзе з мінулага года, раней ужо ў яго прапаноўваліся змены, якія не былі прынятыя па розных прычынах. Так, старшыня выканкаму Аляксандар Пазняк у свой час прапанаваў скарэктаваць План далучыўшы да Оршы вёску Дачная (раён сельгастэхнікі), але не пагадзілася мясцовае насельніцтва. Арганізацыі сябры Аршанскай дэмакратычнай кааліцыі прапаноўвалі цэлы шэраг зменаў, якія тычыліся перш за ўсё будаўніцтва дарогаў. Самае спрэчнае пытанне ў час ранейшага грамадскага абмеркавання — будаўніцтва жылой забудовы на беразе Адрова паміж Баранню і Оршай і пракладка тут 4-ох палоснай магістралі, якая пройдзе паміж возерам Шчацінкаўскім (Кар’ер) і Адровам. Аніводныя змены ў мінулым годзе не прайшлі. Але нечакана райвыканкам абвесціў пра ўнясенне зменаў у план і асобнае абмеркаванне гэтых зменаў.

Адзіная магчымасць цалкам зразумець у чым заключаюцца змены ў Генплан — папрысутнічаць на адпаведнай яго прэзентацыі, якая праходзіла ў выканкаме. У далейшым Генплан быў выстаўлены ў фае выканкаму, але толькі ў выглядзе мапы, без тлумачальных дакумантаў. Пасля прэзентацыі разабрацца ў зменах магчыма было толькі наведаўшы галоўнага архітэктара горада, спадзяючыся, што чыноўнкіі арзітэктуры асабіста растлумачаць вам што да чаго.

Што ж прынцыпова новага цяпер у Генплане? Па змененаму Генплану спрэчная забудова паміж Баранню і Оршай не толькі не будзе прыбраная, але яшчэ і вырасце. Цяпер гаворка ідзе не толькі пра катэджны пасёлак на беразе Адрова для якога як бы і планавалася 4-ох палосная магістраль, але пра тое, што забудаваная будзе ўся тэрыторыя ад Дачнай і Кар’ера да Хараброўскіх могілак і Барані. Хаця праэкціроўшчыкі адзначалі, што могуць узнікнуць пытанні з ацяпленнем ды іншымі камунікацыямі для шматкватэрных дамоў, якія тут запланаваныя.

Па-сутнасці, ідэя аб’яднаць Оршу і Барань на гэтай тэрыторыі існуе з савецкіх часоў, калі ва ўладзе панавала гігантаманія. Але сёння законы змяніліся і для аб’яднання населеных пунктаў патрабуецца згода жыхароў гэтых населеных пунктаў. Менавіта праз у свой час Бабінічы не былі далучаныя да Оршы, вёска Барань да горада Барань, а Дачная, нават, па ініцыятыве мэра, не аб’ядналася з Оршай. У дадзеным выпадку геаграфічнае аб’яднанне Барані і Оршы чарговы раз перанеслася ў Генплан. Хаця, канешне, Генплан хаця і важны дакумант, але толькі план. Свае прапановы па зменах у гэты дакумант, які будзе рэгуляваць развіццё горада на бліжэйшыя 10 гадоў можна ўнесці яшчэ да 22 лютага. Бліжэй да лета Генплан можа быць прыняты цалкам.