За тыдзень беларускія мытнікі спынілі незаконнае транспартаванне ў Расею агулам 80 тон грушаў польскага паходжання. Агульны кошт тавару склаў 570 тысяч беларускіх рублёў.
Чатыры грузавікі з грушамі былі спынены паблізу беларуска-расейскай мяжы віцебскімі і гомельскімі мытнікамі, а таксама супрацоўнікамі Аператыўнай мытні пры правядзенні адмысловых мерапрыемстваў.
Прадукцыю перавозілі без неабходных таварасуправаджальных дакументаў і сертыфікатаў, якія пацвярджаюць яе бяспеку, паведамляе прэс-служба мытні.
Супрацоўнікі Аператыўнай мытні выявілі, што адзін з грузавікоў накіроўваўся ад беларуска-польскай мяжы на беларускіх рэгістрацыйных нумарах, якія ў Віцебску замянілі на расейскія.
У дакументах, па якіх кіроўца ўвозіў тавар праз мытную мяжу, месцам разгрузкі грушаў значылася Ворша. Аўтамабіль жа ішоў зусім у іншым напрамку.
Аператыўная мытня распачала адміністрацыйны працэс па арт. 13.12 КаАП Рэспублікі Беларусь, а ў Віцебскае абласное ДАІ перададзены матэрыялы па парушэнні, прадугледжаным ч. 6 ст. 18.11 КаАП Рэспублікі Беларусь.
За парушэнне парадку транспартавання садавіны да адміністрацыйнай адказнасці будуць прыцягнуты і астатнія перавознікі.
