Сёння - 8 траўня ў Беларусі абвесцілі дату прэзідэнцкіх выбараў - у гэты ж дзень па шматлікіх рэгіёнах прайшлі палітычнаматываваныя затрыманні. Затрыманні сёння адбываліся ў многіх гарадах краіны. Пакуль што правабаронцы не назвалі агульную колькасць затрыманняў, бо лік ідзе на дзясяткі чалавек і не ўсе прозвішчы яшчэ вядомыя. Цэнтральнай фігурай затрыманняў стаў Сяргей Ціханоўскі - блогер, які вядзе канал у сацыяльных сетках "Страна для жизни", яго затрымалі на днях і цяпер пачалі затрымліваць людзей, якія ўдзельнічалі ў запісах яго відэа-стрымаў.

Не абыйшла лавіна палітычных аблаваў і Оршу. У нашым горадзе - па нашых дадзеных - было затрымана два чалавекі. Іллю Ціханава затрымалі супрацоўнікі ДАІ на вуліцы Леніна побач з былым піўзаводам. Ілля ўдзельнічаў ў сустрэчы з блогерам Сяргеем Ціханоўскім (канал "Страна для жизни") і, відавочна, таму стаў аб'ектам увагі супрацоўнікаў міліцыі. Але бліжэй да вечара (амаль праз тры гадзіны пасля затрымання) стала вядома, што яго пакідаюць у ізалятары часовага ўтрымання і абвінавачваюць па артыкуле 23.4 (непадпарадкаванне законным патрабаванням...)

Пазней нам стала вядома, што маёр міліцыі прыйшоў дадому да Алены Мірашнічэнка - вядомай у Оршы зооабаронцы, якая таксама запісвалася на відэа калі Сяргей Ціханоўскі прыязжаў у Оршу. Міліцыянт ёй прад'явіў пратакол паводле якога здымкі стрыма міліцыяй прызнаюцца несанкцыянаваным пікетам, а яна ўдзельнікам несанкцыянаванай акцыі. Алена не пагадзілася з пратаколам і, адпаведна, з абвінавачаннем.

Яшчэ пазней мы даведаліся, што міліцыянты прыйшлі да хаты яшчэ аднаго чалавека, які меў дачыненне да "Страны для жизни". Яго затрымалі проста дома і накіравалі ў ізалятар часовага ўтрымання, у чым яго абвінавачваюць нам пакуль не вядома.