Усе тры суды правяла суддзя Юлія Вяршыніна. Прычым на разбіральніцтва пратакола, складзенага па ч.2 арт.19.11 КаАП на Васіля Шыцікава, ёй хапіла менш за 15 хвілін. Судовы працэс над ім распачаўся ў 11.00, а наступны суд - над Васілём Парфененкам - быў прызначаны на 11.15.
Імя трэцяга падсуднага - Аляксей Сукорскі. 9 лютага яго ўжо судзілі за «распаўсюд экстрэмізму» па ч. 2 арт. 19.11 КаАП. Тады яго справу таксама разбірала суддзя Юлія Вяршыніна.
Аляксей Сукорскі вядомы ў асяродку аршанскіх футбольных фанатаў. Пад увагу сілавых структур хлопец трапіў яшчэ ў 2018 годзе. Тады падставай для судовага разбору стаўся інцыдэнт, які здарыўся на аршанскім стадыёне падчас матчу паміж футбольнымі камандамі Оршы і Ліды. Дзяжурныя міліцыянты заўважылі на шапцы Аляксея Сукорскага нашыўку з надпісам «A.C.A.B.». Яны вырашылі, што гэтая абрэвіятура — скарочаны абразлівы выраз на адрас «калег» («All Cops Are Bastards» у перакладзе азначае «Усе копы — вырадкі»). Аляксея Сукорскага затрымалі. У яго дома правялі ператрус, а потым судзілі. У выніку хлопец двое сутак правёў пад вартай, а судовы разбор скончыўся штрафам за непадпарадкаванне міліцыянтам – яны сцвярджалі, што падчас затрымання Сукорскі хацеў ад іх уцячы.
Чым скончыліся ўчорашнія суды за “распаўсюд экстрэмісцкіх матэрыялаў”, пакуль не вядома. Санкцыі артыкула 19.11 КаАП прадугледжваюць у якасці пакарання і штрафы, і - што часцей прымяняецца апошнім часам - арышты на “суткі”.
