10 млн рублёў плануе выкарыстоўваць на рамонт і ўтрыманне дарог у Аршанскім раёне сёлета філіял ДРБУ № 181 КУП «Віцебскаблдарбуд».
Амаль 8 млн сыдуць на бягучы рамонт, яшчэ каля 2 млн рублёў — на ўтрыманне.
На прадпрыемстве сцвярджаюць, што асвоілі і ўкаранілі сучасную тэхналогію стабілізацыі жвіровых пакрыццяў, калі асфальтагранулят здымаюць і перапрацоўваюць, дадаючы цэмент і эмульсію. Гэта зніжае выдаткі амаль у тры разы. За апошнія пяць гадоў гэтым спосабам адрамантавалі 25 км дарог.
Дык шмат гэта ці мала — 10 млн рублёў на рамонт і ўтрыманне дарог у Аршанскім раёне? На гэтае пытанне Orsha.eu прапануе кожнаму даць свой адказ, прывядзем толькі лічбы ад Міністэрства транспарту і камунікацый:
- Каб правесці бягучы, гэта значыць ямачны рамонт 1 км дарогі, патрабуецца 350 тыс. руб.
- На поўную рэканструкцыю, калі з двух палос робяць паўнавартасныя чатыры, — у сярэднім 10 млн руб.
- Кошт 1 км дарогі першай катэгорыі —
2-3 млн даляраў. Але канчатковыя выдаткі залежаць ад розных чыннікаў.
ДРБУ № 181 адказвае за 767 км аўтамабільных дарог мясцовага значэння. З іх 327 км — з асфальтабетонным пакрыццём. Філіял абслугоўвае 46 мастоў і 820 пагонных метраў водапрапускных труб.
