Амаль два тыдні ў Оршы не было заўважна палітычных працэсаў. Але, бачна, карная сістэма выйшла з двухтыднёвых святаў і зноў пачала работаць. Сёння ў Оршы прайшло, як мінімум, два суды па артыкуле "Распасюд экстрэмісцкіх матэр'ялаў".
Так, раніцай судзілі Аляксандра Марчэнка. А ў неўказаны афіцыйна час судзілі Ўладзіміра Ясінскага. Калі ў раскладзе судоў не ўказваецца дакладны час суда, то - па нашых назіраннях - гэта можа азначаць, што затрыманы ён быў раней і судзілі яго не ў будынку суда.
А ў Дубровенскім раёне "палітыкай займацца" пачалі раней - прыблізна тыдзень таму тут быў затрыманы Дзяніс Пятроў, які цяпер знаходзіцца у Віцебскім СІЗА. Гэта азначае, што супраць мужчыны завялі крымінальную справу. Наколькі мы ведаем, яго вінавацяць па нейкім "палітычным" артыкуле, але пакуль без падрабязнасцяў.
Таксама ў рэспубліканскіх СМІ сёння прайшла інфармацыя, што міліцыянты пачалі хадзіць па школах дзе праводзяць "прафілактыку". Калі раней пад прафілактыкай мелася на ўвазе размова пра наркотыкі ды рэальныя злачынствы, то цяпер міліцыянты ў навучэнцаў 9-11 класаў правяралі тэлефоны і пагражалі адказнасцю за "залішнюю цікавасць да палітыкі" ды забаранялі збірацца ў групы ў дзень выбараў.
