Францкевіч - актывіст анархістскага руху, прызнаны беларускай праваабарончай супольнасцю палітычным зняволеным.
Яго затрымалі 13 жніўня 2020 года і амаль паўтара гады трымалі за кратамі да суду. Суд працягваўся яшчэ 4 з паловай месяцы. У выніку Аляксандра Францкевіча прызналі вінаватым па 14-ці крымінальных артыкулах, у тым ліку за арганізацыю і фінансаванне масавых беспарадкаў, стварэнне злачыннай арганізацыі, стварэнне экстрэмісцкага фармавання або ўдзел у ім.
Канчатковы прысуд, вынесены Аляксандру Францкевічу - 16 гадоў і 9 месяцаў у калоніі ва ўмовах строгага рэжыму і штраф памерам 22 400 беларускіх рублёў.
Асуджанага некалькі разоў пераводзілі ў розныя месцы зняволення. Спачатку ён адбываў тэрмін у івацэвіцкай калоніі № 5, але пазней яго перавялі ў ваўкавыскую ПК-11. Паўгода таму кіраўніцтва гэтай калоніі распачала супраць вязня крымінальную справу паводле арт. 411 КК (Злоснае непадпарадкаванне адміністрацыі). Па рашэнні суда Аляксандру Францкевічу дадалі яшчэ год да ранейшага тэрміну і перавялі ў аршанскую ПК №8. Цяпер адміністрацыя і гэтай калоніі ініцыявала такую ж краминальную справу. Аляксандру Францкевічу зноў могуць дадаць ад паўгода да двух гадоў у зняволенні.
