У самым пачатку праспекта Тэкстыльшчыкаў ДАІ зрабіла так званы "астравок бяспекі", які насамрэч можа справакаваць аварыю. Само з'яўленне такой штучнай няроўнасці, якія складаецца з пліткі, выклікала вялікія спрэчкі сярод аршанцаў у інтэрнэце. Большасць схіляецца да таго, што з'яўленне такога аб'екта не ідзе на карысць дарожнаму руху. Па адной з версій, выказаных у суполцы "Подслушано Орша", астравок зроблены, каб не было абгонаў па бліжняй да ходнікаў паласе перад пешаходным пераходам. Аднак той факт, што астравок бяспекі ніяк не пазначаны, напрыклад жоўтымі палоскамі, можа справакаваць аварыю. Фота, зробленае на пад'ездах да няроўнасці, паказвае, што кіроўца, хутчэй за ўсё, заўважыць такі астравок толькі пасля прыпынку "Дзіцячы садок", а там можа хапіць і невялікай хуткасці, каб урэзацца ў яго. Вялікае пытанне, чаму дарожныя службы ніяк не пазначылі штучную няроўнасць.
