Орша, Палітыка

Будуць новыя суды

15.09.2020 11:28

5703 прагляду, 32 каментара

Яшчэ два ўдзельнікі акцыяў пратэсту атрымалі павесткі ў міліцыю, а ў Горках не выйшаў Андрэй Юркоў

У Оршы працягваюцца рэпрэсіі супраць удзельнікаў мірных мітынгаў. Так, нам стала вядома, што затрыманы ў пятніцу Аляксандар Школьнікаў, які ў той жа дзень быў і асуджаны, атрымаў 5 сутак арышту. Выйдзе на волю Аляксандар у сераду каля 10-00.

У нядзелю быў затрыманы Віталь Паўлаў. Ён традыцыйна а 14-00 выйшаў са сцягамі на цэнтральную плошчу Оршы. Калі на пратэст сабралося пад 10 чалавек, да яго падыйшоў участковы і папрасіў прайсці ў міліцыю на вуліцу Леніна. Адтуль Віталя завезлі ў РУУС дзе склалі пратакол за яго ўдзел у акцыі 6 верасня. Як гаворыць сам Віталь, падцверджаннем яго ўдзелу ў пратэстах стаў запіс з нагруднай камеры міліцыянта. Калі адбудзецца суд пакуль не вядома.

Прыйшлі міліцыянты і да Васіля Бераснева. Яму ўручылі павестку ў міліцыю на сераду.

У Горках з мясцовага ІЧУ не выпусцілі Андрэя Юркова. Ён быў асуджаны за мясцовыя пратэсты, на якія збіралася больш за тысячу чалавек, на 15 сутак. Але ў дзень калі ён мусіў выйсці на волю, яму накінулі яшчэ 7 сутак, якія ён не адседзеў яшчэ да выбараў.