У Смаленску ачышчаюць Дняпро ў гарадской мяжы. Плануецца выпрастаць рэчышча ракі, вызваліўшы яе ад тонаў смецця. Дзяржкантракт заключаны са смаленскай фірмай "Неруд", якая запрасіла ў якасці субпадрадчыка беларускую фірму "Днепра-Бужскі водны шлях" з Пінску. Участак, які трэба ачысціць, складае 7,5 кіламетраў.

У перыяд ліўнёвых дажджоў і таяння снегу мноства маленькіх рачулак і ручаёў выносяць у Дняпро аграмадную колькасць пяску, адыходы вытворчасці прамысловых прадпрыемстваў і проста смецце. Беларускія спецыялісты на ачышчэнні займаюцца вывазам усяго смецця ў Шэйнаўскі кар'ер. У выніку выпроствання рэчышча (у ходзе работ будзе канфіскавана каля 175 тысяч кубаметраў грунту) прапускная здольнасць Дняпра павялічыцца, і вясновы ўздым ўзроўню вады ўжо не будзе дасягаць у Смаленску крытычных адзнак, наносячы, як гэта было ў мінулым годзе, шкоду гарадской гаспадарцы, маёмасці жыхароў і прадпрыемстваў.

Узяцца за ачыстку рэчышча Дняпра ўлады рэгіёну заахвоціла будаўніцтва ў Смаленску набярэжнай коштам звыш 600 мільёнаў расейскіх рублёў, а таксама паўстаўшыя ў перыяд падрыхтоўкі да 1150-годдзя Смаленска планы адраджэння пасажырскага і турыстычнага рачнога суднаходства. У тым ліку воднага злучэння Смаленска з Оршай.

Аднак, як заявілі ў фірме "Неруд", ачышчэнне Дняпра зусім ніяк з суднаходствам не звязана. Справа ў тым, што Дняпро ў раёне Смаленска ўжо з 1979 года не лічыцца суднаходна ракой, а горад не мае неабходнага для гэтага навігацыйна-гідраграфічнага абсталявання.