Суворы прысуд Наталлі Хершэ, якая мае грамадзянствы Швейцарыі і Беларусі не застаўся без увагі замежнепалітычнага ведамства Швейцарыі — Федэральнага дэпартаменту замежных спраў Канфедэрацыі. Жанчына, якая паходзіць з Оршы, але ўжо некалькі гадоў жыве ў гэтай цэнтральнаеўрапейскай краіне, была асуджана на 2,5 гады зняволення за сарваную з амапаўца балаклаву. Праваабаронай супольнасцю Беларусі Наталля Хершэ прызнаная палітзняволенай.
«Федэральны дэпартамент замежных спраў пацвярджае, што адбыўся суд над арыштаванай швейцарска-беларускай грамадзянкай Наталляй Хершэ. Амбасадар Швейцарыі прыняў удзел у працэсе ў якасці назіральніка. Тым самым ён падкрэсліў значэнне, якое мае гэта судовая справа для Федэральнага дэпартаменту замежных спраў. Суд асудзіў спадарыню Хершэ на два з паловай гады турмы. Цяпер дэпартамент сумесна з адвакатам спадарыні Хершэ будуць вызначаць далейшыя крокі. Спадарыні Хершэ будзе па-ранейшаму аказвацца дапамога ў рамках консульскай абароны. У мэтах аховы правоў асобы і прыватнасці іншая інфармацыя раскрывацца не будзе».
