На вакзале ў Воршы яшчэ ў чэрвені міліцыя затрымала падазронага расейца. Праверка па базе паказала, што раней яго ўжо высылалі з Беларусі за сур’ёзныя злачынствы, але забарона на ўезд не перашкодзіла яму вярнуцца. На яго завялі крымінальную справу за парушэнне тэрмінаў забароны ўезду.
Гісторыя пачалася ў 2016 годзе, калі жыхар Расеі быў асуджаны ў Беларусі за згвалтаванне і спробу рабавання. Суд Дзяржынскага раёна прыгаварыў яго да 6 гадоў пазбаўлення волі.
Мужчына спачатку адбываў пакаранне ў Бабруйску, але праз год яго перавялі з калоніі ў турму. А ў канцы 2018 года зняволенага перадалі ў Расею для далейшага адбывання пакарання на ягонай радзіме. Да прымусовай высылкі дадалі забарону ўезду ў Беларусь на 6 гадоў — да снежня 2024 года.
Адбыўшы пакаранне і вызваліўшыся ў снежні 2022 года, расеец амаль адразу адправіўся на захопніцкую вайну супраць Украіны. Хутчэй за ўсё, ён патрапіў не ў шэрагі рэгулярнай арміі, а ў ПВК «Вагнера» - менавіта гэтая групоўка актыўна набірала зняволеных і судзімых для адпраўкі на фронт, часта па кароткатэрміновых кантрактах, мяркуе «Люстэрка». «Вагнераўцы» вядомыя шэрагам забойстваў цывільных жыхароў ва Украіне і ў Афрыцы, а таксама іншымі ваеннымі злачынствамі.
Ужо праз некалькі месяцаў расеец вярнуўся ў цывільнае жыццё і, нягледзячы на дзейную забарону на ўезд, вырашыў зноў адправіцца ў Беларусь. Ён перасек мяжу, маючы намер дабрацца да Барысава: там у яго жылі бацькі. Аднак далёка заехаць не атрымалася: 6 чэрвеня 2023 г. яго затрымалі супрацоўнікі міліцыі на чыгуначным вакзале Ворша-Цэнтральная.
Супраць мужчыны распачалі крымінальную справу па арт. 371-2 Крымінальнага кодэкса (Парушэнне тэрміну забароны ўезду ў Рэспубліку Беларусь). Увесь час следства ён правёў у СІЗА. На судзе расеец цалкам прызнаў віну. Ён патлумачыў, што ведаў аб забароне на ўезд, але ўсё роўна вырашыў наведаць бацькоў. Паводле яго слоў, ён усвядоміў, што незаконна заехаў у краіну, і раскайваецца ў сваім учынку. Гэта была ўлічана як змякчальная акалічнасць. У той жа час абцяжарвальнай акалічнасцю стаў рэцыдыў злачынства, гэта значыць парушэнне закону пры непагашанай судзімасці. Але быў прыняты да ўвагі і трэці чыннік.
«Матэрыяламі справы ўстаноўлена, што абвінавачаны <…> з’яўляўся ўдзельнікам спецыяльнай ваеннай аперацыі, за што мае падзякі», — гаворыцца ў дакуменце. У цяперашняй Беларусі пры Лукашэнку, рэжым якога дапамагае Расеі ў вайне супраць Украіны, такі фактар лічыцца як «змякчальны».
Пакаранне па артыкуле магло быць прызначана ў выглядзе штрафу, арышту або пазбаўлення волі на тэрмін да года. І суд Аршанскага раёна абраў самы мяккі варыянт з улікам абставін.
3 верасня 2023 года расейца прыгаварылі да трох месяцаў арышту, залічыўшы ў гэты тэрмін час, ужо праведзены ў СІЗА. Ён быў там з 6 чэрвеня — а значыць, ужо праз тры дні пасля вердыкту суда выйшаў на волю.
