Нядбайнасць шэрагу дзяржаўных устаноў у год, калі тысячы беларусаў памерлі ад каранавірусу, проста здзіўляе. Па інфармацыі нашага парталу, прадстаўнікі энергетычнай галіны пачалі наведваць кватэры аршанцаў, каб азнаёміцца з паказаннямі лічыльнікаў і станам дадзеных агрэгатаў.

Спраўнасць лічыльнікаў і планавыя праверкі адмяняць нельга, але можна перанесці. Амаль няма сумневаў, што выконвацца праверкі будуць нават без належных захадаў абароны — масак, пальчатак, т.д. З улікам таго, што дома ўдзень звычайна застаюцца людзі сталага веку, для іх небяспека заражэння ўзрасце шматкроць. Хочацца верыць, што праверкі будуць згорнутыя да часоў, калі рэкорды па новых захворваннях не будуць абнаўляцца кожны дзень.

У Беларусі і падчас першай хвалі каранавірусу ігнараваліся меры абароны, не было ўведзена ўсеагульнага каранціну, што магло б захаваць не адно жыццё. Хварэюць людзі ад дзіцячага да сталага веку, для апошняй катэгорыі заражэнне COVID-19 нясе асаблівую небяспеку, высокі працэнт смяротнасці. Толькі паводле афіцыйнай статыстыкі, якой ёсць шмат прычын не давяраць, у Беларусі памерлі 1273 чалавекі, а захварэлі больш за 160 тысяч. Паводле шэрагу ананімных і адкрытых прызнанняў лекараў, рэальныя маштабы пандэміі ў Беларусі нашмат большыя і, магчыма, перавышаюць працэнт на душу насельніцтва ў нашых суседзяў у Польшчы, Украіне, Літве і іншых еўрапейскіх краінах.