Жонка Севярынца Вольга паведаміла пра гэта ў сваім фэйсбуку. 24 снежня яна атрымала ліст ад Паўла, у якім той расказаў, што пра працяг тэрміну пад вартай — да 20 лютага 2021 году — яму паведаміў новы следчы ў ягонай справе.

«Аказаўся з Круглянскага раёну (Магілёўскай вобласці) — відаць, у Менску жадаючыя скончыліся», — адзначыў Севярынец у лісце.

Ён не стаў падпісваць пастанову пра працяг следства, а яшчэ і сам папярэдзіў следчага.

«За фабрыкацыю крымінальнай справы будзе адказнасць у адпаведнасці з заканадаўствам. Вы, кажу, лепш займіцеся заявамі ад мірных грамадзянаў, якіх на вуліцы збіваюць невядомыя ў чорным. Маўчыць. Бачу, крыжык на шыі. У Бога верыце, кажу? Бог бачыць. Тут ён уперыў у мяне „цвёрды позірк“, ды і хвіліны не вытрымаў, вочы апусціў. Потым яшчэ раз, але зноў — вочы долу. Грызе, відаць, сумленне. Няхай Госпад прабачыць», — працытавала ліст Паўла Севярынца ягоная жонка.

Яна таксама зачытала віншаванне з Раством, якое даслаў яе муж.

«Сёлета Госпад адкрыў па-над нашай краінай неба. Святло Божае праменіць з Беларусі па ўсім свеце. Цуды здараюцца штодня», — напісаў Павел Севярынец пра 2020 год, большую частку якога правёў за кратамі.

Севярынца затрымалі 7 чэрвеня, калі ён вяртаўся дахаты пасля пікету па зборы подпісаў на Камароўскім рынку.