У Беларусі з 1 студзеня перагледзелі стаўкі падаткаў для тых, хто здае ў арэнду кватэры, дачы, гаражы і парковачныя месцы. У некаторых гарадах, у тым ліку Оршы і Полацку, падатак на здачу ў арэнду аднаго жылога памяшкання паднялі больш чым на 40%. Новаўвядзенні прадугледжаны абноўленым Падатковым кодэксам.
У абласных цэнтрах падатак за здачу кватэр паднялі да 32,2 рубля, а гаражоў — да 8,9 рубля. У такіх гарадах, як Баранавічы, Бабруйск, Барысаў, Жлобін, Жодзіна, Ліда, Мазыр, Маладзечна, Наваполацк, Орша, Пінск, Полацк, Рэчыца, Светлагорск, Слуцк, Салігорск, збор за здачу кватэр вырас да 21,1 рубля, а гаража — да 5,6 рубля.
Да прыкладу, у Наваполацку ў 2020-м падатак за здачу ў арэнду жылога памяшкання складаў 20 рублёў, а ў Полацку і Оршы — 15 рублёў. У апошніх двух гарадах рост падатку за здачу ў арэнду жылых памяшканняў — амаль на 41% (за здачу ў арэнду гаражоў, да прыкладу, падвышэньне не такое значнае — з 5,3 да 5,6 рубля). Рост склаў амаль 5,7%.
У іншых гарадах абласнога, раённага падпарадкавання і мястэчках гарадскога тыпу падатак за здачу ў арэнду жылога памяшкання з 1 студзеня складае 15,5 рубля, гаража — 4,4 рубля, а ва ўсіх астатніх населеных пунктах і тэрыторыях — 11,1 рубля і 3,4 рублі адпаведна.
