Палітычная зняволеная рэжыму Лукашэнкі працягвае перабываць у месцах пазбаўлення волі ў Беларусі. Суд даў ёй 2,5 года за зрыў балаклавы з амапаўца, які скардзіўся на вялікія маральныя пакуты ў судзе.
Швейцарскія дэпутаты ў лісце да міністра замежных спраў Беларусі Уладзіміра Макея напісалі, што наяўнасць у Беларусі палітвязняў не дае развівацца міждзяржаўным адносінам.
Ліст падпісалі 86 з 200 дэпутатаў Нацыянальнай рады Швайцарыі.
У адкрытым лісце, апублікаваным напярэдадні запланаванага на 16 лютага разгляду апеляцыйнай скаргі Наталлі Хершэ, дэпутаты адрасавалі міністру замежных справаў Беларусі патрабаванне неадкладнага вызвалення грамадзянкі Швейцарыі, а таксама больш чым 240 іншых палітзняволеных у Беларусі.
У адкрытым лісце прадстаўленыя ўсе групы Федэральнага парламенту.
Зняволенне Хершэ і іншых палітвязьняў называецца «сур’ёзным цяжарам у замежнапалітычных дачыненнях» Швейцарыі і Беларусі.
Дэпутатка Нацыянальнай рады Швейцарыі Барбара Гізі з гораду Санкт-Гален, дзе жыла Хершэ, стала сімвалічнай «хроснай» беларускай палітзняволенай у межах кампаніі нямецка-швейцарскай праваабарончай арганізацыі Libereco.
Гізі перакананая, што прысуд Хершэ належыць неадкладна скасаваць, а саму яе вызваліць, бо жанчына не парушала закону, а толькі выконвала свае канстытуцыйныя правы.