Калі быць больш дакладным, то мы яшчэ не ведаем ці распачаўся суд, калі каля будынка Магілёўскага абласнога суда адбылося першае затрыманне. Але пра ўсё папарадку...
Нагадаем, што ўраджэнцы Ашаншчыны Павал Севярынец і Дзмітрый Казлоў разам з шэрагам іншых актывістаў былі затрыманыя на адным з перадвыбарчых пікетаў амаль 11 месяцаў таму. З тае пары яны знаходзіліся пад вартай у Мінску, але пару тыдняў таму было абвешчана, што з-за загружанасці мінскіх судоў, іхны працэс адбудзецца ў Магілёве і ў закрытым рэжыме. Калі родныя і сябры прыехалі раніцай да будынка Магілёўскага суда, то заўважылі тут амаль усё мясцовае начальства міліцыі. Людзі не спрабавалі патрапіць у залю дзе будзе адбывацца суд, але каля 40 чалавек зайшлі ў сам будынак, каб падтрымаць сваёй прысутнасцю вязняў, калі іх будуць весці на суд. За 20 хвілін да таго як павінен быў пачацца працэс, людзей выгналі і з будынка суда. А потым выклікалі АМАП. Ужо ў прысутнасці АМАПу адзін з афіцэраў міліцыі папярэдзіў, што калі людзі не разыйдуцца ад будынка, то гэта будзе ўспрынята як несанкцыянаваная акцыя. Прыблізна ў гэты ж час каля будынка суда быў затрыманы журналіст праваабарончага цэнтра "Вясна" Аляксандар Буракоў-старэйшы.
У самім будынку засталіся толькі маці Паўла Севярынца Таццяна і ягоная жонка - яны хочуць сустрэцца са старшынём суда.
Мы працягваем адсочваць сітуацыю.
