Прыбаўленні ў вазе жывёлы перавысілі максімальна магчымыя — тры работніцы сельгаспрадпрыемства «Абольцы» Талачынскага раёну трапіліся на прыпісках.

6 траўня завяршыўся суд над трыма калгасніцамі, якіх абвінавачвалі ў службовай падробцы (частка 1 артыкул 427 КК), прычым дзве з падсудных ужо былі судзімыя па гэтым жа артыкуле, піша ННВ.

На лаве падсудных апынуліся загадчыца фермы, загадчыца малочнатаварнага комплексу і галоўны заатэхнік сельскагаспадарчага прадпрыемства. У віну ім паставілі прыпіскі прыбаўленняў у вазе цялушак, якія яны ўнеслі ў справаздачы ў пачатку 2021 года. Прыпіскі выплылі вонкі, калі праверка выявіла, што прыбаўленні ў вазе жывёлы перавышаюць максімальна дапушчальныя (звыш 1,5-1,7 кілаграма ў суткі). Кантрольныя ўзважванні гэта пацвердзілі.

На судзе дзве жанчыны прызналі сябе вінаватымі, а трэцяя — не. Аднак суд прыйшоў да высновы, што ўсе тры калгасніцы наўмысна ўнеслі ў афіцыйныя дакументы ілжывыя звесткі. Прычым галоўны заатэхнік зрабіла гэта з карыслівай і іншай асабістай зацікаўленасці, а загадчыкі — толькі з іншай асабістай зацікаўленасці.

На падставе часткі 1 артыкула 427 КК заатэхніка і загадчыка фермай прыгаварылі да пазбаўлення права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў на 2 гады, а былую загадчыцу МТК — на 1 год.