Аўкцыённы дом «Літфонд» — расейская арганізацыя, якая гандлюе рэдкімі рукапісамі, антыкварнымі кнігамі і дакумантамі. Сярод тавараў прысутнічаюць і іншыя антыкварыяты. На днях на адзін з лотаў гэтага аўкцыёну звярнуў увагу краязнаўца Эдуард Навагонскі. Лот быў прададзены яшчэ ў 2018 годзе — амаль праз сто гадоў пасля свайго стварэння.
Прадаваўся дакумант Аршанскай уезднай надзвычайнай камісіі — продак КДБ. Дакумант гэты — расстрэльны спіс з 46 чалавек, якія, відавочна, і былі расстраляныя ў Оршы, бо ў дакуманце гаворыцца, што расстрэл мусіць адбыцца тэрмінова ў двухдзённы тэрмін. Значыць людзі гэтыя былі расстраляныя да 18 ліпеня 1919 года, праз два дні пасля стварэння дакуманта-загаду.
У дакуманце тлумачыцца і прычына расстрэлу: у сувязі з пагрозай наступлення бела-палякаў. То бок, у Оршы расстралялі 46 чалавек з-за патэнцыйнай пагрозы, што пад час наступлення суперніка людзі з гэтага спіса могуць дапамагчы наступаючаму боку. Публікуем фотаздымкі дакуманта з якіх вы самі можаце паглядзець і тэкст дакуманта і прозвішчы тых хто патрапіў у расстрэльны спіс.
Дарэчы прададзены дакумант быў за 22.000 расейскіх рублёў.
