Вярхоўны суд паведаміў пра прысуд для чатырох аршанскіх спорцікаў. Нагадаем, што прыблізна паўтара гады таму ў СМІ пачалі з’яўляцца паведамленні пра дзейнасць так званых «спорцікаў». Гэта маладзёны, якія гвалтам рэгулююць спрэчкі ўнутры наркабізнэсу. Па-сутнасці, гэта новы тып арганізаванай злачыннасці ў які ўцягваюцца вельмі маладыя людзі. За гэтыя 1,5 гады было арыштавана ўжо некалькі аршанскіх брыгадаў спорцікаў, таму нам складана сказаць пра якую брыгаду ідзе гаворка ў дадзеным выпадку. Але прынцыпова не гэта, а тое якія тэрміны атрымалі вельмі маладыя людзі.

Агулам судзілі 4 чалавекі, якія ўдзельнічалі ў бандзе і прымянялі жорсткі гвалт у дачыненні да дробных наркагандляроў. Двое з гэтых маладзёнаў — непаўнагадовыя.

Абвінавачвалі кожнага па некалькіх артыкулаў сярод якіх: захоўванне наркотыкаў (падобна, што яны адбіралі наркотыкі ў сваіх ахвяраў) і гвалт. Па кожным артыкуле кожнаму з арыштаваных прысуджалі свой тэрмін, а потым аб’ядноўвалі гэтыя тэрміны. Канчаткова хлопцы атрымалі: абвінавачаны Ж. атрымаў 13 гадоў пазбаўлення волі, абвінавачаны К. канчаткова атрымаў 12 гадоў калоніі ўзмоцненага рэжыму. Непаўнагадовы Д. быў асуджаны на 12 з паловай гадоў калоніі для непаўнагадовых, але ў гэтую калоніі ён паедзе напачатку, а потым будзе пераведзены ў звычайную калонію для дарослых. Як і абвінавачаны Т., які атрымаў 11 гадоў выхаваўчай калоніі.

Усе гэтыя маладыя людзі выйдуць на волю ўжо немаладымі людзьмі.