Усе справы пра якія ідзе гаворка, праходзяць па артыкуле 24.3 адміністратыўнага кодэкса - непадпарадкаванне патрабаванням пасадовай асобе. Артыкул больш падыходзіць для палітычнаматываваных прысудаў і аніяк не асацыюецца з пакараннем для чыноўнікаў-кіраўнікоў прадпрыемствам.
Канешне, такі артыкул можа прымяняцца ў дачыненні да каго заўгодна, але па ўсёй вобласці за гэты год па стане на канец жніўня суды вынеслі агулам 22 такіх пакаранні чыноўнікаў. З іх канкрэтна ў Аршанскім раёне - 17! То бок, па некалькі разоў на месяц Аршанскі суд карае кагосці з дырэктароў за тое, што яны камусці не падначальваюцца. А непадначальваюцца яны, як аказваецца, прадстаўнікам "Энэргазбыту". Дакладна вядома, што за супраціўленне энэргетыкам ужо тройчы за год каралі начальніка КХП (яго асудзілі 2 чэрвеня, 7 ліпеня, 1 жніўня), кагосці з адміністрацыі "Задняпроўскага", Ільнокамбіната, Смалянскага і іншых прадпрыемстваў. На днях стала вядома пра такі ж суд у дачыненні да дырэктара прыдпрыемства "Вусце". За канфлікт з энэргетыкамі яго прыгаварылі да штрафу ў 74 рублі.
Сітуацыя незвычайная. Або Энэргетыкі робяць нейкія правакацыі, або выконваюць план, дамаўляючыся з дырэктарамі (не здарма ж штрафы такія маленькія) або... Адзін з тэлеграм-каналаў, які мы не можам назваць з-за яго "экстрэмісцкага" статуса выказаў версію, што ў рэгіёне ідзе паўнавартасны канфлікт паміж чыноўнікамі і энэргетыкамі. І прычына гэтага - павальная запазычанасці дзяржаўных прадпрыемстваў па аплаце за электрычнасць. Таму дырэктары спрабуюць не дапусціць энэргетыкаў на тэрыторыю прадпрыемства для абразання "лішніх" правадоў, а тыя сталі безкампраміснымі і пачалі такіх дырэктароў караць.
Якая б ні была прычына гэтых штрафаў, сітуацыя, сапраўды, не звычайная - нідзе па краіне больш столькі штрафаў па дадзеным артыкуле чыноўнікам не выпісваюць.
