Гарадскія ўлады запланавалі ўзвядзенне двух шматкватэрных жылых дамоў у квартале ўжо існуючай забудовы па вуліцы Наватараў. На цяперашняй дваравой тэрыторыі паблізу гарадской лякарні № 2. Абмеркаванні пачаліся 20 чэрвеня і скончацца 4 ліпеня. Будаўнічыя работы плануецца пачаць у першай палове 2025 года.

Таксама зацікаўленых асоб чакае прэзентацыя праекту. Яна адбудзецца ў аўторак, 25 чэрвеня, а 10-й гадзіне ў будынку райвыканкама, у вялікай залі на 1-м паверсе. Знаёміцца з матэрыяламі можна будзе ў працоўныя дні з 8:00 да 13:00 і з 14:00 да 17:00. Доступ свабодны.

Некаторыя матэрыялы можна папярэдне паглядзець загадзя на схеме з магчымасцю павелічэння па пстрычку.

Заўвагі і прапановы можна падаваць у пісьмовай і электроннай форме па адрасе: 211391, г. Ворша, ул. Аляксандра Астроўскага, 2, каб. 112 — аддзел архітэктуры і будаўніцтва Аршанскага райвыканкаму, электронны адрас: [email protected].

Слуханні і прыём прапаноў і заўваг праводзіць Пастаянная камісія па правядзенні грамадскіх абмеркаванняў у сферы архітэктурнай, горадабудаўнічай і будаўнічай дзейнасці.

Дамы плануецца збудаваць у 10 паверхаў кожны, яны будуць двухсекцыйныя. Неабходнасць абумоўліваюць недахопам жылых дамоў у жыллёвым фондзе горада і прагнознымі паказнікамі ў колькасці насельніцтва. Створана і тлумачальная запіска адносна будаўніцтва (на расейскай мове).

У новых дамах плануюць зрабіць па 80 кватэр, па сорак 1-пакаёвых і 2-пакаёвых кватэр адпаведна.