Фактычна гэтае прызнанне - пытанне выключна фармулёвак. Пару тыдняў таму ўлады прызналі шэраг нашых старонак у сацыяльных сетках экстрэмісцкімі. Пры гэтым было не зразумела, а што з самім сайтам orsha.eu, улічваючы, што большасць інфармацыі спачатку размяшчаецца на ім, а потым ужо ў сацыяльных сетках. У мінулай пастанове гучала: "медыя orsha.eu" і ішоў пералік канкрэтных старонак. У гэты раз улады вырашылі ўдакладніць і асобна прызналі сайт экстрэмісцкім.
Нагадаем, што сайт (адрас і назвы мяняліся, але рэдакцыя працавала амаль без зменаў) orsha.eu пачаў працаваць з 2007 года. А ў 2021 годзе быў заблакаваны на тэрыторыі Беларусі. Цяпер яшчэ і атрымаў статус экстрэмісцкага, што можна лічыць пазнакай якасці. Дарэчы, сайт не патрабуе аніякіх падпісак, адпаведна, яго прагляд бяспечны, тым больш праз сервісы VPN, праз якія ён і адкрываецца ўнутры краіны.
