Нараджэнне сына замест святочнай падзеі ледзь не ператварылася ў трагічную. Аршанка Таццяна 10 ліпеня нарадзіла дзіця, а ўжо на наступны дзень адбылося надзвычайнае здарэнне.
Паводле Таццяны, 10 ліпеня ёй зрабілі кесарава сячэнне. Пакуль жанчына знаходзілася ў рэанімацыі, яе наведаў педыятр і паведаміў, што стан сына здавальняючы. Далейшую гісторыю спадарыня апавядала ў ТыкТоку.
— 11 ліпеня раніцай да мяне прыйшла Таццяна Агароднікава —намеснік загадчыцы радзільнага дома па медчастцы, у 2023-м стала пераможцам рэспубліканскага конкурсу «Лекар году» ў намінацыі «Лекар-акушэр-гінеколаг». Калі я стала задаваць пытанні, чаму не прыносяць, не паказваюць майго сына, яна адказала, што я яшчэ слабая, таму мне яго прынясуць крыху пазней, — расказвае аршанка. — Пасля гэтага прыкладна з 14 да 15 гадзін дня яна зноў да мяне прыйшла і прапанавала прайсці ў яе суправаджэнні да дзіцяці.
У гэты момант Таццяна вельмі ўзрадавалася. Аднак убачыўшы, што яе вядуць у рэанімацыю, запанікавала. У рэанімацыі ёй паведамілі, што па збегу акалічнасцяў на дзіця ўпала лямпа, і яно атрымала апёк правай галёнкі трэцяй ступені.
У каментарах пад відэа сталі ўдакладняць, што гэта была за лямпа і навошта пад яе паклалі дзіця. Тады Таццяна расказала больш падрабязна.
— У выпісцы з радзільні напісана, што дзіця было змешчана на пеленальны стол пад лямпу з мэтай абагравання, — сказала яна і дадала, што надзвычайнае здарэнне адбылося ў аддзяленні для нованароджаных.
Пасля здарэння яе сын тыдзень знаходзіўся ў рэанімацыі ў Воршы, а потым яго перавялі ў хірургічнае аддзяленне абласной дзіцячай лякарні ў Віцебску. Там дзіцяці зрабілі аперацыю па перасадцы скуры. Цяпер маленькі хлопчык у нармальным стане.
Жанчына паведаміла, што яна ўжо падала заяву ў Следчы камітэт і напісала зварот у Міністэрства аховы здароўя. Апошняе, кажа, перанакіравалі ў вобласць. Адзначае, што вынікаў па яе зваротах пакуль няма.
Загадчыца Алена Гурко не хавала ад журналісткі, якая датэлефанавалася ў радзільню пад выглядам будучай мамы, што выпадак з апёкам сапраўды быў. Яна сказала, што нованароджаны быў у віцебскай лякарні чатыры дні. У радзільні адзначаюць, што вельмі перажываюць няшчаснае здарэнне.
Выглядае, што лямпы, адна з якіх упала на дзіця, неўзабаве заменяць. Але пакуль гэта адбываецца ў Аршанскай радзільні паэтапна.
