Упраўленне Следчага камітэта па Віцебскай вобласці паведаміла, што завершана расследаванне крымінальнай справы аб незаконным абароце асабліва небяспечных псіхатропных рэчываў. Паводле следства, 15-гадовая школьніца з Воршы ў папулярным мэсэнджэры адгукнулася на аб’яву аб хуткім заробку.
«Прага лёгкіх грошай прывяла дзяўчыну ў наркабізнэс. На ўказанне куратараў яна забірала буйныя партыі псіхатропаў, расфасоўвала іх на разавыя дозы і рабіла закладкі», — пішуць следчыя.
Аб злачыннай дзейнасці дзевяцікласніцы стала вядома дзякуючы аднаму з яе сваякоў. Размовы не далі карысці, дзяўчына не паслухала парад і прыняла рашэнне з’ехаць жыць у іншы горад. Куратар наркашопу нават зняў для яе кватэру ў Наваполацку. Па дарозе ў новы горад дзяўчына забрала са схованкі больш за 45 г асабліва небяспечнага псіхатропнага рэчыва альфа-PVP і прывезла яго ў Віцебск. На вакзале школьніцу затрымалі супрацоўнікі міліцыі.
Следчыя дапыталі абвінавачаную і сведкаў. Вывучылі і далучылі да матэрыялаў крымінальнай справы заключэнне экспертных даследаванняў. У мабільным тэлефоне фігуранткі знойдзена перапіска з куратарамі наркашопу.
Па выніках расследавання 15-гадовай школьніцы прад’яўлена абвінавачанне па ч.4 арт.328 (незаконныя з мэтай збыту набыццё, захоўванне, перавозка псіхатропных рэчываў, учыненыя ў адносінах да асабліва небяспечных псіхатропных рэчываў у буйным памеры арганізаванай групай) КК.
Санкцыя артыкулу прадугледжвае пакаранне ў выглядзе пазбаўлення свабоды на тэрмін ад 10 да 20 гадоў. Да фігуранткі прыменена мера стрымання ў выглядзе ўзяцця пад варту. Расследаванне крымінальнай справы завершана, матэрыялы перададзены пракурору для накіравання ў суд.
