Супрацоўніцу сенненскай Цэнтральнай раённай лякарні асудзілі за «распаўсюд экстрэмізму». Суд адбыўся яшчэ 27 жніўня, стала вядома праваабаронцам.
Вольга Васілёнак — кардыёлаг з Сянна. Яе імя да нядаўняга часу было пазначана ў раскладзе Сенненскай лякарні ў якасці загадчыцы тэрапеўтычнага аддзялення. Але зараз ім кіруе ўжо іншая жанчына ў статусе «выканальніцы абавязкаў».
Праўдападобна, Вольгу Васілёнак ужо звольнілі з працы.
Справу Вольгі паводле ч.2 арт. 19.11 КаАП (распаўсюд экстрэмісцкіх матэрыялаў) 27 жніўня рзглядаў суд Віцебскага раёну. Яго вынік пакуль не вядомы. А чалавека ў цяперашніх беларускіх умовах лёгка можна звольніць і «задняй датай».
Раней чыноўнікі адрапартавалі, што толькі правялі «тлумачальныя размовы» з супрацоўнікамі Сенненскай цэнтральнай раённай лякарні. Але затым высветлілася, што размова не была проста гутаркай, адбываліся і суды са звальненнямі. І гэта пры тым, што спецыялістаў востра не стае.
Першай сярод супрацоўніц сенненскай медыцыйны пад пераслед рэпрэсіўных уладаў трапіла Эльвіра Конышава, якая працуе ў хуткай дапамозе і скончыла Аршанскі медычны каледж. Эльвіра таксама займаецца даследчай працай, вывучае падлеткавыя самагубствы і мае поспехі ў сваіх даследваннях — летась яе даследаванне прызналі і ўручылі дыплом на рэспубліканскім конкурсе.
Агулам называліся пяцёра чалавек медыкаў з Сянна, якім пагражаюць судамі за «экстрэмізм».
