Дзяржаўнае агенцтва Белстат падвяло вынікі крымінальных зводак за апошнія пяць гадоў. «Сумная» навіна для аматараў расказваць стэрэатыпы пра Воршу — Аршаншчына не ўваходзіць у спіс найбольш крымінальных рэгіёнаў Беларусі.
За апошнія пяць гадоў, паводле звестак Белстата, злачыннасць знізілася ў Віцебскай і Мінскай абласцях. А вось у астатніх рэгіёнах яна павялічылася.
Больш за ўсё злачынствы адзначаліся ў Асіповіцкім (Магілёўская вобласць) і Добрушскім (Гомельская вобласць) раёнах. У гэтых рэгіёнах у 2023-м на кожныя 100 тыс. жыхароў фіксавалі больш за 1450 злачынстваў. Гэта ў паўтара раза вышэй, чым у сярэднім па краіне.
Трэцяе месца ў рэйтынгу заняў яшчэ адзін раён Магілёўскай вобласці — Клічаўскі — з паказчыкам 1386 злачынстваў на 100 тыс. чалавек.
Зрэшты, Аршанскі не з’яўляецца і зусім спакойным, прынамсі, не ўваходзіь у тройку найменей крымінальных. Туды ўвайшлі тры заходнія раёны Віцебскай вобласці: Шаркаўшчынскі (478 злачынстваў на 100 тыс. чалавек), Докшыцкі (553) і Глыбоцкі (601).