У прэс-службе "Луча" адзначаюць, што калекцыя гадзіннікаў з цытатай Караткевіча, была лімітаваная. Выпусцілі ўсяго 95 штук. Кошт быў 1 495 рублёў! Гадзіннік быў зроблены на самым тонкім механізме, які калі-небудзь выпускаў завод. На цыферблаце была цытата нашага знакамітага земляка: «Мова, прыгожае пісьменства, паэзія, музыка — сродак сувязі між думамі людзей, вышэйшы сродак».
Як пісаў orsha.eu, да Дня роднай мовы, які адзначаецца 21 лютага, прадпрыемства выпусціла лімітаваную калекцыю гадзіннікаў, якая так і называецца — «Мова-2025». Першы гадзіннік у гэтай серыі прысвечаны памяці Уладзіміра Караткевіча — ураджэнца Оршы і вядомага беларускага пісьменніка.
«Гадзіннік адлюстроўвае самога пісьменніка. У кожным элеменце характар гэтага выбітнага чалавека. Нержавеючая сталь, як постаць, залатое матавае пакрыццё, сапфіравае шкло і механізм — „Луч-2209“, як удумлівы погляд, што ведае значна больш, чым астатнія», — так апісвалі гадзіннік ягоныя стваральнікі.
