Галоўны трэнер зборнай Беларусі ў міні-футболе Аляксандр Чэрнік па выніках навучальна-трэнавальных збораў назваў канчатковы склад каманды на наступныя гульні.
6 і 9 сакавіка зборная Беларусі згуляе з камандай Фінляндыі ў адборавых гульнях на першынство Еўропы. Абедзьве сустрэчы пройдуць у Будапешце на арэне «Sterbinszky Amália Kézilabdacsarnok».
Склад нацыянальнай міні-футбольнай зборнай можа быць вельмі цікавым заўзятарам. Па-першае, у ім прысутнічаюць два гульцы «Вітэну» — Максім Батурын і Павел Рагавік. Абодва — верхаводы чырвона-чорных у першынстве краіны, і трэнерскі штаб зборнай спадзяецца, што і ў нацыянальнай камандзе гэта пара будзе гуляць першыя ролі.
Таксама ў зборную выклікалі нападніка Дзмітрыя Швядко з расейскага КПРФ. Пра поспехі гэтага гульца, які паходзіць са Смалянаў, мы неаднаразова пісалі. На гэты момант ён адзін з найбольш яскравых футбалістаў Беларусі.
