У другой сустрэчы чвэрцьфінальнай серыі беларускай хакейнай Экстралігі аршанскія чыгуначнікі зноў сустракаліся з менскім «Юнацтвам» на ягонай пляцоўцы. І зноў сустрэча на «Чыжоўка-Арэне» прынесла няўдачу сіня-аранжавым.

Хаця ўжо на 57-й секундзе сустрэчы Балаболкін адкрыў лік. Да 11-й хвіліны на табло гарэлі спрыяльныя для каманды з Воршы лічбы, аднак затым мянчук Роўба зраўняў лік.

Наступныя праблемы напаткалі «Лакаматыў» у наступных перыядах. Дземчанка і Кучкін закінулі па шайбе ў кожным з іх і гарантавалі «Юнацтву» вікторыю 3:1.

Другая параза «Лакаматыву», і лік стаў 2-0 на карысць «Юнацтва». Цяпер у аршанцаў будзе дзве магчымасці згуляць з менчукамі дома. Можна як зраўняць лік у серыі, так і цалкам яе прагуляць.

Між іншым, аўдыторыя на «Чыжоўка-Арэне» гэтым разам не «дацягнула» да тысячы чалавек, на сустрэчы прысутнічалі 872 гледачы.

Галоўны трэнер «Лакаматыва» Ігар Жылінскі адзначыў, што яму няма ў чым папракнуць сваіх падапечных, яны змагаліся належным чынам. На думку трэнера, «чыгуначнікі» саступаюць хакеістам «Юнацтва» ў майстэрстве, але б’юцца да канца. Таксама сярод прабелмаў ён адзначыў, што ў складзе каманды мала гульцоў, якія маюць добры досвед выступленняў у фазе ўцінання. Тым не менш, Жылінскі паабяцаў пастарацца вярнуць серыю ў Менск.