У серыі з тытулаваным менскім «Юнацтвам» аршанскі «Лакаматыў» насамрэч дзейнічае досыць паспяхова. Яшчэ да серыі аршанскі бок прызнаваў, што ў майстэрстве і падборы гульцоў саступае менскаму. Аднак ніхто сярод чыгуначнікаў і не думае здавацца ці адразу аддаваць усе лаўры менчукам.
Лік у серыі напярэдадні чацвертага матчу 0-3, «Юнацтву» хопіць адной перамогі для выхаду ў паўфінал, якому ніхто не здзівіцца. Аднак, што адметна, ніводная вікторыя не здабытая чырвона-сінімі лёгка. Дзве перамогі ў дадатковыя перыяды, прычым адна з іх у другім 20-хвілінным, што стала найдаўжэйшым паядынкам «Лакаматыву» ў гісторыі. І адна перамога 3:1, калі каманда з Воршы таксама навязала паважнае змаганне супару.
Чацвертая сустрэча адбудзецца ў Воршы 14 сакавіка на лядовай арэне. Старт паядынку, а 19:00. Гульню пакажуць на Ютуб.
